Kauderwelsch saxonicum:
Da kennsch ehn, n Heins, denn kennsch dorweeschn gud, sinn eischntlich voll das Dreamteam, wie mor jetze ega so scheen saacht. Unn wie mor so ä biddl gebranst hamm, simmor örschndwie droff gekomm, ma enne Weltreise zu machn. De neue Welt wollt mor sehn, de Nicaraguafälle in Grenada, oder wo die sinn, unn de Anden, wo de Kondome flieschn, hoch ohm in greislichn Höhn. Ahr oh de alde Welt wollt mor besischtschn. Nach Taifun wollt mor unn dorde mit n rischtschn Samowar kämfn. Das wär bestimmt ne Rausforderung gewäsn, soviel saach sch glei! Nu hadde ahr mei Kumpel Heins immer örschndwas annorsch, ehma haddors midn Hibiskus inn Knie, annorma haddor am Behn ä Hippodrom. Dann haddor oh noch ega Wanstrammeln unn de Hypotenuse im Koppe machtn verriggt. Mei Gudster, haddor da gesaacht, das wird wo nischt rischtsches mit unsrer Weltreise. Ahr da häddsch glei bleede wärn könn. Mor wolltn scha oh noch zamm n Maunt Evening besteischn, ahr das geht mid solschn Zibberlein glei gar nä! Unn wallor ega örschndwas annorsch hadd, hammor unsre Reise desweeschn ärschtmah verschohm, mor hamm scha oh gar nä so rischtsch Geld für solschn Brans. Ahr örschndwann habsch dann oh midgekrischt, dass dor Heins gar nä sone Phimose iss und ega bloß stimuliert hadd. Das wollt mor anfangs gar nä rischtsch inn Nischl nei unn ärschtmah warsch gans komplex. Da habbschn ahr dann glei gans klar unn klipp de Meinung gegeischt, unn nuuh haddor glei gar keeh Word mehr mid mir geredd. Da simmor ehm alle beede dorheeme gebliehm!